|
|
فائل فوٹو
برطانیہ کے بادشاہ شاہ چارلس سوم کو دنیا کے 50 سب سے اسٹائلش افراد کی فہرست میں شامل کرلیا گیا ہے، یہ فہرست معروف فیشن میگزین برٹش جی کیو （British GQ） نے 2025 کے لیے جاری کی ہے۔
میگزین کے مطابق 76 سالہ شاہ چارلس برطانوی فیشن اور ٹیلرنگ کے سب سے بڑے سفیر ہیں۔
رپورٹ میں ان کے مخصوص انداز کو سراہتے ہوئے لکھا گیا ہے کہ برطانیہ کے سربراہِ مملکت کی اینڈرسن اینڈ شیپرڈ کے سوٹ، ٹرن بل اینڈ ایسّر کی شرٹس اور جان لوب کے جوتے دہائیوں سے ان کے اسٹائل کی پہچان بنے ہوئے ہیں، جو وقت کے ساتھ مزید نکھرتے گئے ہیں۔
شاہ چارلس کے ساتھ اس فہرست میں کئی معروف نام شامل ہیں، جس میں جسٹن بیبر، بِل نائی، رالف لارن، شَیر، ایما کورن اور زوئی کریوٹز بھی شامل ہیں۔
دلچسپ بات یہ ہے کہ شاہ چارلس اس فہرست میں شامل ہونے والے واحد شاہی فرد （Royal） ہیں، شاہ چارلس فیشن میں پائیداری （Sustainability） کے حامی سمجھے جاتے ہیں اور اکثر اپنے پرانے کپڑے دوبارہ پہننے یا مرمت کرانے کو ترجیح دیتے ہیں۔
انہوں نے 2020 میں میگزین Vogue سے گفتگو میں کہا تھا کہ میں ان لوگوں میں سے ہوں جنہیں چیزیں ضائع کرنا پسند نہیں، اس لیے میں انہیں مرمت کرا کے دوبارہ استعمال کرنا پسند کرتا ہوں۔
برطانوی میڈیا کے مطابق شاہ چارلس کا یہ منفرد انداز اور ان کی ماحولیاتی آگاہی انہیں فیشن اور شخصیت دونوں کے لحاظ سے ایک باوقار اور بااثر رہنما کے طور پر نمایاں کرتی ہے۔ |
|
发表于 2025-11-3 19:57:36