فلک شبیر کا پاکستان آئیڈل کے حق میں بیان، مداحوں کے دل جیت لیے
https://jang.com.pk/assets/uploads/updates/2025-10-30/1524161_8931365_4_updates.jpgفائل فوٹو
معروف گلوکار فلک شبیر نے موسیقی کے مشہور رئیلٹی شو پاکستان آئیڈل کے حق میں بیان دے کر مداحوں کے دل جیت لیے۔
پاکستان آئیڈل کا نیا سیزن حال ہی میں نشر ہونا شروع ہوا ہے، یہ شو اپنے ججز پینل کے باعث تنازعات کا شکار ہے، شو کے جج فواد خان کو اس بنیاد پر تنقید کا سامنا ہے کہ وہ خود گلوکاری میں کمزور سمجھے جاتے ہیں مگر دوسروں کی آواز پر فیصلہ سنا رہے ہیں۔
کئی معروف گلوکاروں بشمول سجاد علی، حمیرا ارشد اور ملکو نے اس شو کو کم معیار اور کم بجٹ قرار دیتے ہوئے کہا کہ اس کے ججز پینل اور گانے کے انتخاب میں بہتری کی ضرورت ہے۔
تاہم، دوسری جانب ساحر علی بگا اور فلک شبیر جیسے فنکاروں نے پاکستان آئیڈل کی حمایت میں آواز بلند کی ہے۔
حال ہی میں فلک شبیر نے انسٹاگرام پر اعلان کیا کہ وہ پاکستان آئیڈل کے تمام شرکاء کو اجازت دیتے ہیں کہ وہ ان کے تمام گانے مقابلے میں گا سکتے ہیں۔ https://jang.com.pk/assets/uploads/updates/2025-10-30/1524161_6094352_Untitled-21_updates.jpg
گلوکار نے اپنے پیغام میں لکھا کہ میں پاکستان آئیڈل کو اجازت دیتا ہوں کہ وہ میرے تمام گانے استعمال کرے تاکہ ابھرتے ہوئے گلوکاروں کو پلیٹ فارم ملے اور وہ عالمی سطح پر پاکستان کا نام روشن کر سکیں، میں پاکستان آئیڈل کے ججز اور تمام باصلاحیت شرکاء کی مکمل حمایت کرتا ہوں۔
فلک شبیر کے اس جذبے کو شائقین کی جانب سے بے حد سراہا جا رہا ہے، مداحوں نے ان کی فیاضی اور بڑے دل کی تعریف کرتے ہوئے کہا یہ شخص واقعی بڑے دل والا ہے، ایک صارف نے لکھا دیگر گلوکاروں کو بھی ایسا ہی کرنا چاہیے۔
کچھ مداحوں کا کہنا تھا کہ فلک شبیر کا یہ بیان دراصل سجاد علی کے ردِعمل میں آیا ہے۔ ایک صارف نے تبصرہ کیا، ’ہمیں اجتماعی سوچ اپنانی چاہیے اور فلک شبیر کی طرح مثبت رویہ رکھنا چاہیے‘، جبکہ ایک اور نے کہا، ’جن کے دل چھوٹے ہیں وہ پاکستان آئیڈل کے خلاف شور مچا رہے ہیں، وہ صرف اپنا کام بیچنا چاہتے ہیں۔‘
页:
[1]